開心飯局（2024/11/14），討論四大天王的過去及現在，思考，隨想

November 19, 2024

開心飯局（2024/11/14），討論四大天王的過去及現在，思考，隨想

上星期四参加開心飯局，開心是因為提供不少精精神食糧，大家談話沒什麼特別主題，無所不談，包括：投資、短炒、長線、物業、Crypto、美國大選、工作、家庭、生活等，特别想講講麥加文提出的四大天王心理測驗（得到他同意引用他的說話内容及其後在TG Group的留言）。

四大天王心理測驗分析 (只適用出生於70-80年代的香港人)

玩法: 黎明, 劉德華, 郭富城, 張學友排名, 如果排唔到4位, 必定要揀一個

明星能力：唱歌/ 跳舞/ 做戲

明星形象：樣貌/ 公關

黎明主要賣點：靚仔

唱歌 4/10
跳舞 2/10
做戲 2/10
樣貌 9/10
公關 8/10

劉德華主要賣點：勤力

唱歌 6/10
跳舞 4/10
做戲 5/10
樣貌 7/10
公關 4/10

郭富城主要賣點：型同跳舞勁

唱歌 5/10
跳舞 8/10
做戲 6/10
樣貌 8/10
公關 7/10

張學友主要賣點：唱歌

唱歌 9/10
跳舞 2/10
做戲 3/10
樣貌 3/10
公關 5/10

呢個心理測驗分個人價值觀同社會現象。

揀黎明：價值觀喜好包裝感覺良好, 靚仔高大4平8穩, 私生活冇咩負面新聞唔會有尷尬, 實力唔需要太高, 但唔會太差, 也唔會預期有咩爆發性事件好有安全感, 有時兩三句金句普通人都知佢只係扮有深度, 不過唔係最膚淺, 太過高深普通人都唔想花太多精神 (冇能力) 思考, 會跟主流步伐前進, 唔會行得太前, 又唔會定形覺得老土, 舒舒服服一齊過日子, 屬於大眾 (情人) 派。

揀劉德華：價值觀喜好勤力專業形象, 做人唔需要有天份, 只要比其他人努力10倍就可以好好, 私生活顧家好老公family man, 如果唔係捲入政治事件應該仍正面. 後生有型過既時候, 就好似去一個uncle屋企見到佢後生揸電單車彈結他, 突然覺得佢後生一定引死女, 不過而家就唔好搞. 主要佢幾十年都係追求專業, 但專業只係形象, 不是能力, 也沒有打算改變呢個玩法突破, 結果個形象已經fix左廿年前果個劉華, 如果唔鐘意改變, 覺得佢做得正確, 最好唔好變, 廿年前後都一樣就最好, 但部份人會move on, 覺得佢唔轉我只可以繼續前進. 屬於專業派。

揀郭富城：價值觀喜好有性格同型, 一定要有時代潮流感, 就算做左阿爸阿媽C9, 都係希望做型男索女, 後生有活力既感覺, 而且人生係需要不停前進接受挑戰, 有左家庭生活態度不應改變, 但多左責任感唔會不負責任, 對社會事件仍有觸覺 (19年揸林寶去示威地點買奶粉, 21年covid出錢做show), 有條件但唔希望離晒地. 屬於潮流派。

揀張學友：價值觀喜好實力至上, 在實力之外所有野都係表面野, 唔鍾意裝模作樣, 呢D唔係太重要甚至輕視, 也不在爭其他人點睇, 也不會為比面而比面 (拒絕去大陸果D唱歌show, 因為知到做馬), 上左神台都會繼續追求更高層次的能力, 對自己有要求甚於其他人的要求. 但有時感覺太離地, 唔係佢扮而係太focus自己既追求, 冇咩心血理呢個世界發生緊既野, 也唔想理. 唔buy周身刀, 最緊要一把非常利, 屬於精英派。

社會現象：問左超過100人做sample, 的確9成女性都係揀黎明, 男仔就好vary, 近年揀劉德華既好少, 有都係女仔而且係die hard fans, 男仔接近0. 晚飯講香港主流傾向黎明都係觀察現實, 呢個可解釋到香港係傾向形象正面, 睇得順眼, 包裝得體既文化, 因為好景左太多年, 太長時間冇咩大危機, 不追求能力主導, 好勁, 一般勁, 一般, 好差, 一定唔like好差, 主要係樣衰而非會死人, 但好勁, 一般勁同一般分別不大, 安全感同包裝feel good比較重要, 冇咩大風大浪但有面養眼就係生活之道, 唔好太前唔好太後剛剛好。

劉德華同郭富城在填海事件之前係50/50, 近年郭富城大幅跑贏劉德華, 特別在男性中, 主要係感覺劉德華同現在的香港距離太遠, 佢仍活在舊時的香港, 而沒有打算進入新的香港, 而郭富城心中有現在新香港的位置, 所以現在的香港也有他的位置。

張學友唯一是在時代不停改變的環境近乎無損, 因為歌神的地位太高無法被挑戰, 無論佢做咩講咩, 技能值點滿只會想到佢唱歌, 其他都無關, 佢都不需要為生存而改變, 前3位都要, 或唔改會有實際影響, 可是一般人知道太難, 就算做到都難敵果種孤單感, 如果有得揀, 做大眾情人更有吸引力。

我的思考

近十年八年我較為喜歡郭富城，指我現時的感覺，我自己比較喜歡用電影文化藝術角度。

劉德華在電影中的專業，由角色種類到演譯，保持一貫作風，就是十年如一日，我叫停滯不前。（近來電影《焚城》中，表現有進步）

張學友近來參與電影《海關戰線》，角色有空間發揮，不錯。

我自己沒有看過黎明參與的電影，比較有印象是100毛的無厘頭廣告。我不覺得他的金句是扮有深度，反而有一種港式幽默。

郭富城反差好大，以前我覺得佢淨係識跳舞，形象年青活力，唱歌唔特別好，對我而言賣點只在跳舞。由唔識演戲，到做好多不同角色，由2006年電影《父子》開始令我改觀，演爤睹老公／父親，highly recommend，如果你有機會返睇。即係佢會𨍭型，唔會只攻成功左的唯一一項係跳舞。這個令我聯想到「中年危機」，每一個人會不會最終成為食老本的老Seafood，還是尋求方法令自己轉型。

上面提到電影文化藝術，其中包括創新，就是願意去接受新事物的態度，文化可以推及社會及個人的視野，是看法影響想法，想法影響做法。如果表現在投資，我們是否願意去接受新事物，對世界有新理解，科技帶來創新的力量和新的商業模式等。你的投資代表了你的世界觀和價值觀。

電影藝術文化強調創新，應用去香港社會和經濟，不可以十年如一日，我們需要轉型，如何轉型？相信不是單單靠夜繽紛的燒賣雞蛋仔。我相信其中一項是文化。

早前香港花了巨額金錢，請外國Arttist造出的氣球和復活蛋，我自己沒有看，根本沒有興趣。反而心中有一個很大的問號，有資金不是找香港Arttist？這現像都顯示在每一年的香港藝術節，眾多的外國表演團體／表演者。以上種種，可能出於「香港是國際城市」的行銷口號，其實要推銷香港給外國人，是否應該多去構想有香港特色的東西？將心比己，我們去外國旅行，正正想多看當地的特色，而不是入口貨。

《憑科技．贏自由》

主題和内容 | 發售資料

《AI 投資時代．真的值得參與嗎？》

主題和内容 | 發售資料

《科技戰國．尋找科技價值投資的故事》

主題和内容 | 發售資料

下面的Page / Group，歡迎大家Like和Follow，就可以自動收到文章更新。
Facebook
https://facebook.com/duncaninvest
Instagram
https://instagram.com/duncannewinvest
Telegram
https://t.me/duncaninvest
謝謝支持！

參考文章

開心飯局（2024/08/21），講起短炒投資課程

參加明哥派飯活動，提醒我們做事的初衷

開心飯局（2024/05/14），興高采烈的討論

投資 KOL 網絡文化